30-njy iýunda «Makeblock» we «MakeX» hytaý kompaniýalarynyň guramagynda, 65 ýurduň wekilleriniň gatnaşmagynda onlaýn görnüşde robot tehnikasy boýunça halkara bäsleşik geçirildi. Oňa Türkmenistandan «Imdatbot» çagalar robot tehnikalaryny öwrediji merkeziň okuwçylary onlaýn görnüşde gatnaşdylar.

Iki ýaş toparçasynda guralan bäsleşikde çagalar öň berlen tema boýunça özleriniň taslamalaryny hödürleýärler. Şu ýylda geçirilýän bäsleşigiň baş temasy «Az uglerodly ýaşaýyş» boldy.

Türkmenistanly çagalaryň şular ýaly halkara bäsleşige ilkinji gezek gatnaşýandyklaryna garamazdan, olar ýumuşlary birkemsiz ýerine ýetirdiler. Hödürlenen tema boýunça çagalar elektromobiller, ýel energiýasyny öndürmegiň ýollary, hojalyk ekinleriniň goralmagy, «akylly» öý baradaky özleriniň pikirlerini we tekliplerini beýan etdiler.

«MakeX Spark» diýlip atlandyrylan halkara bäsleşik 6 — 13 ýaşlaryndaky çagalaryň arasynda geçirilýär. Döwrebap ylmy ugurlarda çagalaryň arasynda şunuň ýaly halkara bäsleşikleriň geçirilmegi olaryň döredijilikli pikirlenip bilmek ukyplaryny artdyrýar.