Türkmenistanyň Oguz han adyndaky Inžener-tehnologiýalar uniwersitetiniň ekologiýa we tebigatdan peýdalanmak taýýarlyk ugrunyň talyplary Garagum sährasyna tejribe okuw saparyny amala aşyrdylar.

Göçme sapagyň dowamynda talyplara Garagum sährasynyň tebigy şertleri, ösümlik we haýwanat dünýäsi, dermanlyk ösümlikleri barada giňişleýin maglumat berildi. Mundan başga-da, Garagumda gurlan «Altyn asyr» Türkmen kölüniň we onuň şor suw akabalarynyň sähranyň çöl landşaftlaryna edýän oňaýly täsirleri düşündirildi. Talyplar bu ýerde öz diplom işleri bilen bagly zerur maglumatlary topladylar.

Häzirki wagtda uniwersitetiň talyplary tarapyndan «Zeý we lagym suwlaryny arassalamak we gaýtadan peýdalanmak», «Durmuş gaty galyndylaryny (esasan hem, polietilen önümlerini) gaýtadan işlemek we täze önümleri almak» ýaly temalarda tebigatymyzy goramak boýunça ylmy-barlag işleri alnyp barylýar.

Ýeri gelende bellesek, ekologiýa we tebigatdan peýdalanmak taýýarlygyň ugrunyň talyplaryna innowasion tehnologiýalaryň ylmy esaslary dersi boýunça ýurdumyzyň dürli ylmy-barlag edaralarynda, döwlet tebigy goraghanalarynda ýygy-ýygydan göçme tejribe okuw sapaklary geçilýär. Geçirilýän okuw sapaklarynyň dowamynda talyplar degişli edaralaryň ylmy işgärleriniň alyp barýan ylmy işleri bilen tanyşdyrylýar.