Gana döwletiniň paýtagty Akkra şäheri ÝUNESKO tarapyndan 2023-nji ýyl üçin Bütindünýä kitap paýtagty diýip ykrar edildi.
Akkra şäheri sowatsyzlyga garşy göreşmek maksady bilen, geljekki nesilleri ösdürmegiň täsirli usuly hökmünde kitaplaryň güýjüni ulanmagy maksat edinýär. Geçiriljek çäreler okamak medeniýetini, hünär endiklerini ösdürmek, neşirýat pudagyny we beýleki döredijilik pudaklaryny goldamak bilen bagly mowzuklary öz içine alar. Mundan başga-da, gana dilinde kitap okamagy we ýazmagy höweslendirmek üçin seminarlary geçirmek, işsiz ýaşlar üçin hünär we okuw merkezlerini döretmek, Gananyň sungatyny, medeniýetini görkezmek maksady bilen, medeni çärelerdir ýaryşlary guramak meýilleşdirilýär. Çäreler 23-nji aprelde Bütindünýä kitap we awtorlyk hukugy gününde başlanar.
Mundan ozal, Gwadalahara (2022), Tbilisi (2021), Kuala-Lumpur (2020) Bütindünýä kitap paýtagty derejesine eýe bolupdy. ÝUNESKO Bütindünýä kitap paýtagtyny 2001-nji ýyldan bäri saýlap gelýär. Onuň kerwenbaşysy Madrid şäheri bolupdy.
