Şu gün — 23-nji martda türkmen işewürleriniň Türkmenistanyň Söwda-senagat edarasynda birnäçe günläp dowam eden sergisi öz işini tamamlady. Türkmenistanyň Senagatçylar we telekeçiler birleşmesiniň döredilmeginiň 15 ýyllygy mynasybetli guralan sergä telekeçileriň 200-den gowragy gatnaşdy.
Bir hepdeläp dowam eden sergi ýurdumyzyň hususy önüm öndürijileriniň önümleri we hödürleýän hyzmatlary bilen tanyşmaga hem-de işewürlik geleşiklerini baglaşmaga amatly giňişligi döretdi. Nobatdaky gözden geçiriş ýurdumyzyň telekeçileriniň ykdysadyýetde, senagatda, gurluşykda, azyk önümçiliginde, oba hojalygynda we hyzmat ulgamynda uly sepgitlere ýetendigini aýdyňlyk bilen görkezdi. Telekeçileriň sergisinde ýokary hilli, ekologik taýdan arassa, eksport ugurly önümler bilen birlikde, iň täze önümler hem hödürlendi. Sergä «Salam» hojalyk jemgyýeti hem özüniň hödürleýän IT hyzmatlary bilen gatnaşdy.
Sergi bilen birlikde, Türkmenistanyň Senagatçylar we telekeçiler birleşmesiniň döredilmeginiň 15 ýyllygy mynasybetli ýörite maslahat hem geçirildi. Serginiň jemleýji gününde oňa gatnaşan ýurdumyzyň telekeçilerine diplomlar gowşuryldy.
