Adam başyna düşýän girdejisiniň ýokarylygy boýunça Türkmenistan dünýäde 73-nji ýurt boldy. «RoyalRankings» internet neşiriniň mälim etmegine görä, 2022-nji ýylda Türkmenistanda jemi içerki önümiň adam başyna düşýän girdejisi 11 müň 929 amerikan dollaryna barabardyr. Bu görkeziji sebit we goňşy ýurtlardakydan has ýokarydyr.
Internet neşirinde bellenişi ýaly, Türkmenistandan soň, 74-nji orunda ýerleşýän Gazagystanda jemi içerki önümiň adam başyna düşýäni 11 müň 561 amerikan dollaryna deňdir. Sanawda 82-nji orunda ýerleşdirilen Türkiýede adam başyna 9 müň 961 dollar girdeji düşýär. 93-nji ýerde orun alan Azerbaýjanda jemi içerki önüm adam başyna paýlananda 6 müň 842 dollar düşýär diýip, internet neşirinde görkezilýär.
Dünýä sanawynda jemi içerki önümiň adam başyna düşüşi boýunça Özbegistan 150-nji, Gyrgyz Respublikasy 160-njy, Täjigistan 171-nji orunlarda ýerleşdirilipdir.
Jemi içerki önümiň adam başyna iň köp düşýän ýurdy Ýewropadaky Lýuksemburg döwleti boldy. Bu ýurtda jemi içerki önüm adam başyna paýlananda, 127 müň 673 dollardan düşýär. Adam başyna iň ýokary girdejili ýurtlaryň ilkinjileriniň hatarynda yzygiderlilikde Irlandiýa, Norwegiýa we Şweýsariýa döwletleri gelýär.
Internet neşiri bu sanawy Halkara pul gaznasynyň maglumatlaryna salgylanyp düzüpdir.
