Ozal habar berşimiz ýaly, 16-njy martda Türki Döwletleriň Guramasynyň döwlet Baştutanlarynyň Geňeşiniň nobatdan daşary mejlisinde eden çykyşynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkiýe Respublikasynyň Prezidenti Rejep Taýyp Ärdogany parahatçylyk boýunça Nobel baýragyna hödürlemegiň teklip edilýändigini aýtdy. Bu teklibe Moskwa hem ýokary baha berýär diýip, «TASS» habarlar agentligi Russiýa Federasiýasynyň Prezidentiniň metbugat sekretary Dmitriý Peskowyň sözlerine salgylanyp habar berýär.

Dmitriý Peskow žurnalistleriň bu barada beren soragyna jogap edip, şeýle belledi:

—   Biz jenap Ärdoganyň parahatçylyk boýunça eden işlerine, bu ugurda özara gepleşikleri geçirmekde bitiren hyzmatlaryna hem-de onuň rus-türk gatnaşyklaryny ösdürmekdäki tagallalaryna ýokary baha berýäris.

Gurbanguly Berdimuhamedowyň Ankara şäherinde geçirilen mejlisde eden çykyşynda bellemegine görä, Rejep Taýyp Ärdogan ХХI asyrda yslam dünýäsiniň ýurtlarynyň döwlet we Hökümet Baştutanlarynyň arasynda ilkinji bolup bu ýokary baýraga mynasyp şahsyýet hökmünde taryhyň altyn sahypalaryna ýazylsa, maksadalaýyk bolardy.