26-njy ýanwarda paýtagtymyz Aşgabat şäherinde ýerleşýän «Ýyldyz» otelinde Hindistanyň milli baýramy — Respublika güni mynasybetli resmi kabul edişlik guraldy. Oňa wise-premýer Batyr Atdaýew, Hindistan Respublikasynyň Türkmenistandaky Adatdan daşary we Doly ygtyýarly ilçisi Widhu Pithambaran Nair, daşary ýurtlaryň diplomatik wekilhanalarynyň wekilleri, hormatly myhmanlar gatnaşdylar.

Resmi kabul edişlik dabarasynda Türkmenistanyň we Hindistan Respublikasynyň arasynda yzygiderli ösdürilýän hyzmatdaşlyk gatnaşyklary barada durlup geçildi. Hindistanyň ilçisiniň bellemegine görä, geçen ýylda Türkmenistanyň we Hindistanyň arasynda özara haryt dolanyşygy 250 million dollar töweregi boldy. Halkara awiagatnawlaryň açylmagy bilen, özara gatnaşyklaryň şu ýylda has-da ösdürilmegine garaşylýar.

Iki ýurduň bilim pudagyndaky hyzmatdaşlyk barada durup geçen ilçi Hindistanyň «ITEC» bilim maksatnamasynyň çäginde häzirki döwre çenli türkmenistanly ýaşlaryň 400-den gowragynyň Hindistanda bilim alandygyny aýtdy. «ICCR» bilim maksatnamasynyň çäginde bolsa türkmenistanly ýaşlaryň 250-den gowragyna Hindistanda talyp hakly okuwlary okamaga mümkinçilik döredildi.

«Demirgazyk — Günorta» halkara ulag geçelgesi arkaly türkmen-hindi gatnaşyklarynda täze mümkinçilikler açylýar.

Öz gezeginde, wise-premýer Batyr Atdaýew çärä gatnaşyjylary Hindistanyň milli baýramy — Respublika güni bilen tüýs ýürekden gutlady.

Şeýle hem resmi kabul edişlik dabarasynyň çäklerinde Hindistanyň Garaşyzlyk ýyllarynda ýeten sepgitlerini görkezýän ýörite sergi guraldy hem-de resmi günortanlyk nahary berildi.