«Premier Liganyň» çempiony «Mançester Sitiniň» eýesi «City Football Group» arap holdingi düzümine 12-nji futbol klubuny goşdy. Holdingiň brazil kluby «Baiýany» satyn alandygy habar berildi. Bu baradaky resmi maglumatyň resminamalar doly taýýar bolandan soň mälim ediljekdigi habarda bellenýär. «Baiýa» topary Braziliýanyň 2-nji ligasynda çykyş edip, ol 2-nji orunda barýar.
Şeýlelikde, «City Football Group» holdinginiň tutuş dünýädäki eýeçilik edýän futbol klublarynyň sany 12-ä ýetdi. «Holding «Baiýadan» ozal iýul aýynda italýan topary «Palermony» satyn alypdy. Holding häzirki wagtda Angliýada «Mançester Sitiniň» (100%), Ispaniýada «Žironanyň» (47%), Italiýada «Palermonyň» (80%), Belgiýada «Lommeliň (99%), Fransiýada «Truanyň» (100%), ABŞ-da «Nýu Ýork Sitiniň» (80%), Awstraliýada «Melburn Sitiniň» (100%), Urugwaýda «Montewideo Sitiniň» (100%), Ýaponiýada «Ýokohama F. Marinosyň» (20%), Hindistanda «Mumbaý Sitiniň» (65%) hem-de Hytaýda «Syçuan Szýunýunyň» (29,7%) klublarynyň degişli mukdardaky paýnamalarynyň eýesidir. Holding häzirlikçe Boliwiýanyň «Boliwar» toparynyň hem hyzmatdaşydyr.
«City Football Group» holdingini 2013-nji ýylda BAE-li syýasatçy hem-de işewür Mansur bin Zaýed Al Nahaýýan bilen Haldun Al Mubarek esaslandyrýar.
