UEFA Çempionlar Ligasynda Stambuldaky finala barýan ýolda klublar soňky aýlawda ýaryşy dowam etdirýärler. Sähelçe wagt öň ýaryşyň çärýekdir ýarym finalynyň bijeleri çekildi. Bijä laýyklykda, çärýek finalda-da, ýarym finalda-da futbol janköýerlerine azy ýaran duşuşyklar garaşýar.

Soňky çempion «Real Madrid», edil geçen möwsümdäki ýaly, ýene bir ýola çärýek finalda «Çelsi» bilen bije çekişdi. «Interiň» bijesine başga bir portugal kluby «Benfika» düşdi. Tapgyryň, belki-de, iň köp ünsi çekýän bijesi «Mançester Siti» bilen «Bawariýanyň» arasyndaky çärýek final duşuşygy bolar. Pep Guardiolanyň häzirki hem-de öňki klublarynyň arasyndaky 2 duşuşyk köpleriň sabyrsyzlyk bilen garaşylýan duşuşyklaryna öwrüler. «Serie A-da» çempionlyk ugrunda ýiti göreş alyp baran iki italýan topary «Milan» bilen «Napoli» toparlary-da çärýek finalyň beýleki duşuşygy bolar.

Şeýle-de ýarym finalda «Milan» — «Napoli» duşuşygynda ýeňiş gazan topar bilen «Inter» — «Benfika» duşuşygynyň ýeňijisi duşuşar. Beýleki ýarym finalda bolsa «Real Madrid» — «Çelsi» duşuşygynyň ýeňijisi bilen «Mançester Siti» ýa-da «Bawariýa» özara güýç synanyşar.

Çärýek finalyň duşuşyklary — 1-nji oýunlar 11-12-nji aprelde, jogap oýunlary-da 18-19-njy aprelde oýnalar. Ýarym finalyň oýunlary bolsa 9-10-njy hem-de 16-17-nji maýda geçiriler. Möwsümiň çempiony 10-njy iýunda Türkiýäniň Stambul şäherindäki Atatürk Olimpiýa stadionynda oýnaljak finalda belli bolar.

Çärýek finalyň bijeleri:

• «Real Madrid» — «Çelsi»;

• «Inter» — «Benfika»;

• «Mançester Siti» — «Bawariýa»;

• «Milan» — «Napoli».

Ýarym finalyň bijeleri:

• «Milan»/«Napoli» — «Inter»/«Benfika»;

• «Real Madrid»/«Çelsi» — «Mançester Siti»/«Bawariýa».