Germaniýanyň çempionaty «Bundesliganyň» soňky çempiony «Bawariýada» garaşylmadyk waka boldy. Geçen tapgyrda çempionatda liderligi «Borussiýa Dortmunda» aldyran münhenliler toparyň tälimçisi Ýulian Nagelsmanny wezipesinden boşatdy.
Klubuň Münhende indiki oýunlara taýýarlyk görüp, türgenleşik geçýändigine garamazdan, 35 ýaşyndaky tälimçiniň Awstriýada lyža edip ýörendigi we bu ýagdaýyň bolsa klubuň ýörelgesine gelişmeýändigi habarda bellenýär. Tälimçiniň çempionatda şowsuz çykyşy bilen bir hatarda, bu hereketi hem onuň wezipesinden boşadylmagyna sebäp bolan hadysalaryň biri hökmünde görkezilýär.
Netijede, «Bawariýanyň» ýaş hünärmeni wezipesinden boşadandygy mälim edildi. Nagelsmannyň tälimçiliginde klub geçen möwsümde «Bundesligada» çempionlyk gazandy. Bu möwsümde bolsa UEFA Çempionlar Ligasynda çärýek finala çykdy. 2021-nji ýylyň 1-nji iýulynda «Bawariýanyň» tälimçisi bolan Nagelsmannyň tälimçiliginde münhenliler 84 oýunda 60 gezek ýeňiş gazanyp, 10 oýunda-da utuldy.
Nagelsmannyň deregine Tomas Tuheliň wezipä bellenmegine garaşylýar. Tuhel bellenen ýagdaýynda, ol häzirki milli ýygyndylar sebäpli arakesmeden soň ozalky kluby «Borussiýa Dortmunda» garşy ilkinji synagyny geçirer.
