Türkmenistanyň Bedenterbiýe we sport baradaky döwlet komitetiniň hem-de ýurdumyzyň Dzýudo federasiýasynyň bilelikde guramagynda «Olimp» orta sport mekdebinde dzýudo boýunça Türkmenistanyň Kubogy ugrundaky ýaryş geçirildi.

Ýaryşyň guramaçylygynda Halkara Dzýudo federasiýasynyň talaplary doly ýerine ýetirildi. Gyzykly ýaryş ýurdumyzyň dürli künjeginden bolan dzýudoçylaryň ýüzlerçesini bir ýere jemledi.

Ýaş hem-de agram derejeleriniň birnäçesinden guralan duşuşyklar iň güýçli dzýudoçylary ýüze çykardy. Diňe ussatlaryň däl, eýsem ýaşlaryň we ýetginjekleriň bäsleşikleriniň guralmagy bu ýerde hakyky sport baýramçylygyny emele getirdi.

Toparlaýyn hasap boýunça dürli medallaryň 27-sini eýelemegi başaran ýygyndy toparyň agzalary öňe saýlandylar. Ýygyndy toparyň ätiýaçdaky düzüminiň türgenleri 16 medal bilen ikinji boldular. Üçünji orna bolsa 6 medal gazanan Lebap welaýatynyň 4-nji sport mekdebiniň türgenleri eýe çykdylar.

Şu gün dünýä reýtinginden ornuny tapan türkmen dzýudoçylarynyň Portugaliýanyň Gran-prisindäki çykyşlaryna başlaýandyklaryny ýatladýarys.